Kosovë: Merrte 5000 euro për sigurimin e vizave Schengen, arrestohet nga policia

Sipas informacioneve të policisë për një vizë ai ka përfituar nga 3000 deri në 5000 euro.

Një person është arrestuar nga Policia e Kosovës nën dyshimin se ka kryer veprën “kontrabandë me migrantë”.

A.G. dyshohet se u ka siguruar disa personave viza Schengen, në ambasadën e një shteti të huaj, në një shtet tjetër jashtë Kosovës, raporton Albinfo.ch.

“Policia e Kosovës, konkretisht Sektori i Hetimeve i Departamenti të Policisë Kufitare, ndërmerr veprime konkrete ligjore, pas hetimeve të gjata kundër të dyshuarit mashkull, kosovar, me iniciale (A.G.), nën dyshimin e kryerjes se veprës penale “kontrabandim me migrantë”, ku konkretisht dyshohej se i njëjti person qytetarëve të Republikës së Kosovës u ka siguruar viza Schengen, në Ambasadën e një shteti të huaj, në një shtet tjetër jashtë RKS-së”, thuhet në raportin e policisë.

Tutje theksohet se sipas informatave, i dyshuari për sigurimin e një vize viktimave u merrte shuma të ndryshme të parave, konkretisht nga 3000 deri në 5000 euro.

Po ashtu policia ka bërë bastisje në shtëpinë e të dyshuarit dhe aty ka gjetur armë, para dhe një varg provash të tjera që dyshohet se lidhen me rastin.

“Pas veprimeve të nevojshme ligjore nga Policia Kufitare e Kosovës dhe koordinimit edhe me autoritetet e shtetit respektiv, ku ndodhej ambasada e shtetit të huaj, sot më 27.10.2021, me urdhër të Gjykatës Themelore në Prishtinë është bërë kontrolli i shtëpisë dhe lokaleve përcjellëse të të dyshuarit, ku gjatë kontrollit janë gjetur dëshmitë si në vijim: Një revole 7.65 “Cr. Zastava”, 32 Plumba të revoles 7.65 mm, këllëf i revoles (Cr Zastava), Një Revole Ekol Aras Magnum, 13 Plumba me gaz të revoles Ekol Aras Magnum, Një Iphone 11 Pro Max, mbi gjashtë mijë euro para të gatshme, si dhe dinar të Serbisë dhe të Maqedonisë së Veriut”, thuhet në raport.

I dyshuari është intervistuar në prezencë të mbrojtësit të angazhuar sipas detyrës zyrtare dhe me vendim të Prokurorisë Themelore në Prishtinë, i njëjti dërgohet në mbajtje për procedura të mëtejme ligjore./albinfo.ch

---