Kosovë, pranga kontrabanduesit turk

Policia e Kosovës ka arrestuar një shtetas turk nën dyshimin për veprën penale “trafikim me migrantë”

Një qytetar, shtetas i Turqisë, kishte “zbuluar” një metodë të re për t’u pasuruar nëpërmjet kontrabandës. Ai nga Turqia sillte në Kosovë shtetas aziatik e afrikanë, kinse si mysafirë për ta vizituar Kosovën e më pas i trafikonte drejte shteteve të Bashkimit Evropian.

Mirëpo sot, më 10 prill, rreth orës 09:30, në aeroportin ndërkombëtar “Adem Jashari”, ai u arrestua nga Njësiti i Hetimeve të Departamentit të Policisë Kufitare, nën dyshimin e bazuar se i njëjti kryente veprën penale ‘kontrabandim me migrantë’.

Sipas një njoftimi lëshuar nga Policia, i dyshuari i arrestuar në këtë rast është: Y. S. lindur me 1967 në Turqi.

Sipas Policisë, “ekziston dyshimi i bazuar se i dyshuari i lartcekur ka kryer veprën penale ‘kontrabandim me migrant’ dhe i njëjti pas intervistimit me autorizimin e prokurorit kompetent nga Prokuroria Themelore në Prishtinë-Departamenti i Krimeve të Rënda, dërgohet në mbajtje për 48 orë”.

Ndryshe, Kosova dhe vendet tjera të Ballkanit Perëndimor janë bërë trampolinë e emigrantëve aziatik e afrikan, që po e synojnë BE-në. Një javë më parë, në Serbinë Jugore, dy aziatikë u aksidentuan nga treni, pasi ata i kishte zënë gjumi në vijën hekurudhore që lidhë Maqedoninë me Serbinë.