Kosovë: SHBA-ja dhuron 6 milionë dollarë për digjitalizimin e gjykatave dhe SHKK-së

Foto FB: Gjykata Themelore Prishtinë

Shtetet e Bashkuara të Amerikës kanë dhuruar gjashtë milionë dollar për projektin e pajisjeve audio-vizuele për gjykatat dhe Shërbimin Korrektues të Kosovës.

I pranishëm në dhurimin e donacionit ka qenë edhe ndihmëssekretari për Byronë Ndërkombëtare për Narkotikë dhe Sundim të Ligjit të Shteteve të Bashkuara të Amerikës, Todd D. Robinson, i cili ka thënë se digjitalizimi i gjykatave është e ardhmja.

“E përgëzoj KGJK-në dhe SHKK-në për përpjekjet e tyre që ky projekt të realizohet. Ka shumë përfitime nga kjo teknologji. Ofron transkriptim të procedurave gjyqësore. Digjitalizimi i gjykatave është e ardhmja. Teknologjia do t’iu mundësojë dëshmitarëve të cenuar për t’u paraqitur në gjykata. Kur të funksionalizohet plotësisht do të zvogëlohet nevoja e transferimit të të burgosurve në gjykata përfshirë atyre me rrezik të lartë”, ka thënë ai.

Kryesuesi i Këshillit Gjyqësor, Albert Zogaj, ka thënë se këto pajisje do ta ndihmojnë transparencën e gjyqësorit.

“Pavarësia e sistemit gjyqësor dhe llogaridhënia mbetën çështjet më të rëndësishme. Transparenca e gjyqësorit besojmë që është një pikë e fortë e sistemit tonë në Kosovë. Kontributi dhe ndihma që ka dhënë INL për instalimin e pajisjeve të incizimit e ndihmon në masë të konsiderueshëm transparencën. Jep një mbrojtje dhe siguri të veçantë siç janë dëshmitarët e mbrojtur”, ka shtuar tutje ai, transmeotn albinfo.ch.

Drejtori i Shërbimit Korrektues të Kosovës, Ismet Dibrani, ka thënë se projekti i sotëm është ndër donacionet më të rëndësishme të SHBA-së.

“Donacioni i sotëm është ndër donacionet më të rëndësishme. Do të zvogëlojë nevojën për transport nga gjykata dhe burgjet duke bërë që seancat të jenë me efeciente. Mbështetja e qeverisë amerikane ka qenë dhe mbetet qenësore për shërbimin korrektues”, ka thënë ai.