Kosovë: Shuhen 376 ndërmarrje, regjistrohen 2852 të reja

Foto ilustrim: Alex Kotliarskyi

Raporti i Agjencisë së Statistikave në Kosovë tregon se nga janari e deri më tani janë regjistruar 2 852 ndërmarrje të reja, ndërsa janë mbyllur 376.

“Në tremujorin e tretë të vitit 2023 (TM3) gjithsej janë regjistruar 2 852 ndërmarrje dhe janë mbyllur 376 të tjera.

Në TM-3 2023, krahasuar me tremujorin paraprak (TM2 2022) kemi rritje për 7.1% të ndërmarrjeve të regjistruara. Ndërsa krahasuar me tremujorin e njëjtë të vitit paraprak (TM-3 2022) kemi rritje për 4.8% të ndërmarrjeve të regjistruara”, thuhet në raportin e ASK-së.

Aktivitetet ekonomike më të pëlqyera gjatë këtij tremujori janë tregtia me shumicë dhe pakicë, riparimi i mjeteve motorike, motoçikletave me 617 (21.6%), aktivitetet profesionale, shkencore dhe teknike me 334 (11.7%), akomodimi dhe aktivitetet e shërbimeve me ushqim me 228 (10.1%), ndërtimtaria me 275 (9.6%), prodhim me 272 (9.5%) etj.

Struktura e ndërmarrjeve të regjistruara sipas kategorisë së numrit të të punësuarve në kategorinë me 1 deri në 4 të punësuar janë gjithsej 2 765 ndërmarrje të regjistruara në këtë tremujor (96.9%), me 5 deri 9 të punësuar janë 69 sosh (2.4%), 10 deri në 19 të punësuar 14 (0.5%), 20 deri 249 të punësuar me 4 (0.1%), ndërsa në kategorinë me 250 e më shumë të punësuar nuk kemi ndërmarrje të reja në këtë tremujor, thuhet në raport.

Sa u përket ndërmarrjeve të shuara, në TM3 2023 janë 376 ndërmarrje apo rënie prej -5.5%, krahasuar me tremujorin paraprak (TM2 2023). Ndërsa krahasuar me tremujorin e njëjtë të vitit paraprak (TM3 2022) kemi rritje për 1% të ndërmarrjeve të shuara.

 Sa i përket shtrirjes gjeografike të ndërmarrjeve të regjistruara në nivel të komunave ashtu si në çdo tremujorë mbizotëron Komuna e Prishtinës me 825 ndërmarrje të regjistruara (28.9%), Ferizaj me 274 (9.6%), Prizreni me 236 (8.3%), Gjilani me 190 (6.7%), Gjakova me 150 (5.3%) dhe Peja me 145 (5.1%), ndërsa komunat e tjera kanë numër më të vogël të ndërmarrjeve të regjistruara në këtë tremujor, thuhet në raport, përcjell albinfo.ch.