Kristoph Dodaj, lojtari i parë shqiptar i futbollit amerikan në Austri

Kristophi i përcjell thuajse të gjitha ndeshjet e këtij sporti, ndërsa thotë se lojtari i tij i preferuar është shqiptari që luan në Amerikë, Kristjan Sokoli

Talente të shumtë shqiptarë çdo ditë e më shumë shohim në fusha të futbollit kudo nëpër Evropë, por Kristoph Robert Dodaj ka zgjedhur një sport krejtësisht tjetër. 12-vjeçari luan që 4 vjet për ekipin austriak “Vienna Vikings”, dhe është ndoshta fëmija i parë shqiptar që luan futboll amerikan në Austri.

“Gjithmonë më ka pëlqyer ky sport, sepse është i veçantë dhe të jep një kënaqësi tjetër në fushë”, thotë Kristophi për albinfo.ch.

Për të luajtur këtë sport duhet të jesh i fuqishëm, i shpejtë dhe të kesh teknikë. “Lëndohemi nga pak kur të rrezohemi, por mjekët i kemi për çdo gjë”, thotë ai që ndonëse është lindur në Vjenë, flet rrjedhshëm shqip. “Gjuhën shqipe e kam mësuar me familje. Ne flasim gjithmonë shqip në shtëpi dhe shumë shpesh i vizitoj edhe të afërmit e mi në Kosovë”.

Numri që bart Kristophi është 90. Roli i tij në fushë është për të ndërprerë aksionet e kundërshtarit.

Kristophi i përcjell thuajse të gjitha ndeshjet e këtij sporti, ndërsa thotë se lojtari i tij i preferuar është shqiptari që luan në Amerikë, Kristjan Sokoli.

“Nganjëherë nuk mund të rri deri në orët e vona kur ndeshjet zhvillohen në Amerikë, për shkak se më duhet të zgjohem herët për të shkuar në shkollë”, thotë ai teksa tregon se është nxënës i klasës së katërt.

“Në moshën që e kam, më duhet të mësoj, ndërsa kohën e lirë e kaloj duke luajtur këtë sport”, shprehet ai për “albinfo.ch”.
Vogëlushi shprehet se nuk ka pasur rast të njohë asnjëherë ndonjë shqiptar që luan këtë sport në Austri.

Dëshira e Kristophit është që në të ardhmen të transferohet në Amerikë, atje ku është edhe më i zhvilluar ky sport, ndërkohë që ëndërron të këtë një karrierë si njëri nga lojtarët më të mirë në botë të këtij sporti, Tom Brady.

A.Gj.