Kufizimet financiare nga Trump, OKB në Gjenevë shkurton 250 vende pune

Organizata Ndërkombëtare për Migracionin (IOM), një agjenci e OKB-së, njoftoi se do të reduktojë fuqinë punëtore me 250 vende pune në selinë e saj në Gjenevë, për shkak të “shkurtimeve të paprecedentë” prej 30 për qind në donacionet e parashikuara për këtë vit. Kjo situatë është e lidhur ngushtë me një reduktim të ndjeshëm të projekteve të financuara nga Shtetet e Bashkuara në mbarë botën, përcjell albinfo.ch.

Në një njoftim për media, IOM theksoi se këto masa janë të nevojshme për të siguruar vazhdimësinë e ndihmës humanitare për migrantët dhe komunitetet e cenueshme. “Këto vendime do të kenë një ndikim të thellë te kolegët tanë që i kanë kushtuar shumë vite misionit të IOM-it dhe që tani do të humbasin punën e tyre,” u shpreh organizata, shkruan 20minuten.

IOM do të vazhdojë të mbrojë çështjen e migrimit dhe zhvendosjes në qendër të debateve politike globale, duke theksuar se “bota nuk mund të përballojë të shikojë larg ndërsa nevojat rriten dhe burimet pakësohen”.