Kujdes nga “Shaqiri” i rrejshëm!

Kriminelët e internetit e shfrytëzojnë figurën e futbollistit të njohur shqiptarozviceran si karrem për të shpërndarë reklama dhe viruse te shfrytëzuesit e facebook-ut

Në rrjetin e facebook-ut janë paraqitur disa faqe të falsifikuara në emrin e Xherdan Shaqirit. Kriminelët e internetit e shfrytëzojnë figurën e njohur të futbollistit shqiptarozviceran si një karrem për të shpërndarë reklama dhe viruse te shfrytëzuesit e facebook-ut, adhurues të Shaqirit.
Ata e bëjnë këtë në mënyrë mjeshtërore: Fotoja e profilit e tregon Xherdan Shaqirin me rastin e kalimit të tij në klubin e premierligës angleze, Stoke City. Faqja duket autentike dhe në të është ngjitur një deklaratë që gjoja Shaqiri vetë e ka përpiluar. Por në fakt bëhet fjalë për një perpjekje mashtrimi, shkruajnë mediet zvicerane. Kush e përcjell udhëzimin, del në faqe të dyshimta interneti dhe «bombardohet» nga reklama të shumta agresive. Deri tash faqja e falsifikuar ka fituar 10.000 like.
Profilet origjinale të personave prominentë zakonisht dallohen sepse ato e kanë një shenjë të kaltër mbrapa emrit të personit.