Kuotë të veçantë për studentët e Luginës

Do të ketë kuotë të veçantë të pranimit të studentëve të Luginë në Universitetin e Prishtinës dhe atë të Prizrenit

Ministri kosovar i Arsimit, Shkencës dhe Teknologjisë, Ramë Buja iu ka premtuar përfaqësuesve të Luginës së Preshevës se studentët e tri komunave lindore (Preshevë, Medvegjë dhe Bujanoc) do të kenë një kuotë të veçantë të pranimi në Universitetin e Prishtinës dhe atë të Prizrenit.

Ai këto komete i ka bërë pas një takimi që zhvilloi me kryetarin e Komunës së Bujanocit, Nagip Arifi dhe kryetarin e Komunës së Preshevës, Ragmi Mustafa

Ministri Buja ua ka rikujtuar krerëve të Luginës së Preshevës se sistemimi i studentëve të kësaj ane përbën një çështje për të cilën Ministria e Arsimit angazhohet në vazhdimësi dhe se propozim-lista me kuotat e studentëve për pranim në këtë vit akademik do të shqyrtohet seriozisht.

“Do të bëjmë më të mirën në këtë drejtim. Probleme kemi me drejtimet e shëndetësisë, arkitekturën dhe Fakultetin e Arteve, duke qenë se këto degë pranojnë numër të kufizuar të studentëve”, është shprehur ministri Buja.

Buja po ashtu foli edhe për të gjitha zhvillimet e tjera në fushën e arsimit, në veçanti arsimin e lartë në Kosovë dhe angazhimet e Ministrisë së Arsimit për avancimin e tërë procesit arsimor në vend, si dhe procesin njohjes së diplomave.