Kuqezinjtë do të mbrohen për 90 minuta

“Spanja të detyron ta parkosh autobusin, por ne do e vendosim pa rrota për të mos pësuar”, deklaroi De Biasi

albinfo.ch

Përzgjedhësi i Shqipërisë, Gianni De Biasi ka thënë se do të mbrohen ndaj Spanjës, duke parë fuqinë e tyre. “Spanja të detyron ta parkosh autobusin, por ne do e vendosim pa rrota për të mos pësuar”, deklaroi De Biasi, shkruan albinfo.ch.

Ai ka shtuar se Spanja ka shumë futbollistë cilësorë. “Diferencat janë të mëdha, por ne i njohim limitet tona. Ne do të dalim në fushë dhe do të luajmë ndeshjen tonë. Edhe ndaj Portugalisë situata ishte thuajse e ngjashme, por në fund ne arritëm të befasojmë duke fituar”, deklaroi trajneri italian.

Gazetarët spanjollë e pyetën trajnerin e kombëtares shqiptare në lidhje me mungesën e Armando Sadikut dhe sa do të ndikojë ai në këtë takim. “Sadiku është mjaft i rëndësishëm për ne. Ai këtë e tregoi edhe në ndeshjen e fundit ndaj Maqedonisë duke shënuar golin e parë, por i shënoi edhe Villarrealit në Ligën e Evropës. Megjithatë ne do të bëjmë maksimumin për ta zëvendësuar atë”, tha De Biasi, i cili foli edhe për Kukelin, ku tha se ende nuk e ka të qartë nëse do ta ketë në dispozicion mesfushorin për ndeshjen e sotme pas dëmtimit të pësuar në ndeshjen ndaj Lihtenshtejnit.