Kurti u kërkon bashkatdhetarëve që të votojnë për zgjedhjet e BE-së

Këtë të diel, më 9 qershor, në Bashkimin e Evropian mbahen zgjedhjet evropiane. Me këtë rast kryeministri i Kosovës, Albin  Kurit, u është drejtuar bashkatdhetarëve përmes një video-mesazhi, ku u ka kërkuar që të marrin pjesë në zgjedhje, përcjell albinfo.ch.

“Së pari ato ndodhin në rrethana ku një luftë e drejtpërdrejtë po ngjan mu në Evropë, në Ukrainë, pas agresionit rus. Kjo luftë u nis prej një ideologjie fashiste nga Kremlini i Putinit… Së dyti i keni parasysh ndasitë që ekzistojnë brenda BE-së dhe përbrenda vendeve anëtare, përmes këtyre ndasive, Rusia duke u mbështetur gjithashtu në disa rryma politike ekstremiste ose liderë në pushtet të këtyre vendeve, ka ushtruar me vite një ndikim dëmtues.

Qëllimi i Rusisë dhe aleatëve të saj evropianë jashtë dhe brenda BE-së është i qartë: dobësimi i BE-së, dobësimi i projektit të zgjerimit të BE-së dhe të NATO-s, ndërsa ndaj neve, veçanërisht në Kosovë synohet pengesa e çdo perspektive integruese. Kështu që së treti, Kosova si vend aplikoi për anëtarësim në BE dhe si vend që ka për qëllim strategjik kryesor integrimin në BE dhe në NATO, nuk mund të mos marrë pjesë e të mos kontribuojë në çfarëdo forme në ruajtjen e këtyre organizatave dhe vlerave demokratike që ndajmë me to”, ka thënë Kurti.

Ai më tej ka thënë se vota e bashkatdhetarëve në zgjedhjet për Parlamentin e ri Evropian duhet të jetë kontributi kundër rreziqeve që e kërcënojnë kohezionin dhe unitetin e BE-së.

“Prandaj vota juaj në zgjedhjet për Parlamentin e ri Evropian të 9 qershorit duhet të jetë përgjigjja jonë, kontributi ynë kundër rreziqeve që e kërcënojnë kohezionin dhe unitetin e BE-së”, ka deklaruar Kurti.

https://www.facebook.com/watch/?v=381769030982843