Kurti pret në takim Memli Krasniqin, diskutojnë për dy tema

Kryeministri i Kosovës, Albin Kurti, pasditen e sotme do të presë në takim kryetarin e Partisë Demokratike të Kosovës, Memli Krasniqi.

Krasniqi është i vetmi nga tre liderët opozitarë që e ka pranuar ftesën e shefit të ekzekutivit.

Në këtë takim pritet të diskutohet rreth agjendës legjislative, ndërsa sipas Krasniqit, për caktimin e datës së zgjedhjeve.

Shefi i ekzekutivit, përmes këtij takimi të ftuar nga vetë ai, do të synojë të shtyjë para agjendën e legjislativit, derisa i pari i PDK-së caktimin e datës së zgjedhjeve të reja.

Takimi po konsiderohet si i rëndësishëm, edhe pse sipas njohësve të fushës, s’priten rezultate nga ai.

Sipas tyre, kryeministri Kurti është dashur të thërrasë opozitën në takim për të diskutuar rreth çështjeve të tjera shumë më të rëndësishme, si ajo e anëtarësimit në Këshillin e Evropës.

Lidhja Demokratike e Kosovës dhe Aleanca për Ardhmërinë e Kosovës kanë refuzuar ftesën e Kurtit për takim.