Limaj deklarohet i pafajshëm për rastin “Bellanica”

Gjykata Themelore në Gjakovë, më 9 mars, do të shpallë aktgjykimin për Fatmir Limajn për akuzat për krime lufte.

Në fjalën e fundit, Limaj ka thënë se ka qenë i bindur në pafajësi që nga fillimi.

“Jam i bindur që edhe vetë prokuroria e ka ditur që nuk ka prova. Edhe nëse në shqyrtimin gjyqësor nuk kanë arritur të gjenden kryesit e veprës dhe urdhërdhënësi, konsideroj se për familjet e dëmtuara ka qenë satisfaksion, për faktin që është vërtetuar se tendenca për t’i njollosur ka qenë e pasuksesshme”, ka thënë Limaj, përcjell albinfo.ch.

Ndërsa, Prokuroria ka kërkuar dënimin e Limajt. Në fjalën e saj përfundimtare, prokurorja Drita Hajdari, ka thënë se Limaj, nuk e ka përmbushur detyrën e tij të eprorit.

“Limaj nuk ndërmori asnjë veprim për parandalimin e krimit që ishte duke ndodhur. Ai nuk bëri asnjë veprim për zbulimin e autorëve të krimit”, ka thënë prokurorja Hajdari, duke iu referuar vrasjes së Selman Binishit e Ramiz Hoxhës.

Ndërsa, avokati i Limajt, Tahir Rrecaj, ka kundërshtuar qëndrimin e prokurores Drita Hajdari. Një gjë e tillë, sipas Rrecajt, është në kundërshtim me parimin e gjykimit të drejtë dhe me misionin e Prokurorisë së Shtetit. Autorët e vrasjes, katër persona të maskuar, nuk dihen dhe nuk janë identifikuar si pjesëtarë të UÇK-së, ka shtuar Rrecaj.

Ai ka propozuar lirimin nga akuza në mungesë të provave se Fatmir Limaj mund të jetë përgjegjës për këto vrasje.