“Marshi i Pashkëve” për paqen dhe kundër industrisë së luftës

"Kush mbjell armë, do të korrë refugjatë", ka qenë motoja e marshimit paqesor të Pashkëve në Romanshorn (TG)

“Marshimet e Pashkëve”, një organizim tashmë tradicional që mbahet në ditën e festës së madhe të krishterë, ka mbledhur rreth 1200 veta, 500 në Bernë dhe rreth 750 në Romanshon (TG). Në të dyja këto manifestime është protestuar kundër dhunës dhe luftërave, transmeton agjencia e lajmeve, sda. Sipas demonstruesve, “Zvicra është pjesë e makinerisë luftarake pasi që ajo eksporton pajisje ushtarake gjegjësisht armë dhe municion.

Nga ana tjetër, miliona njerëz në botë janë duke ikur të frikësuar nga luftërat e dhuna. E, në të njëjtën kohë po kërkohet të ushtrohet edhe më shumë dhunë “në luftë kundër terrorit”, kanë kritikuar protestuesit. Ndërkohë që, sipas tyre, politika e jashtme dhe ajo e ekonomisë duhej të promovonte paqen.

Marshimi në Bernë është mbajtur nën moton “çarmatim për paqe – mirëseardhje refugjatëve”.

Edhe në Romanshorn, marshi i quajtur “Bodenseemarsch” i është kushtuar përpjekjeve për paqe dhe kundër industrisë së armatimit, përcjell albinfo.ch. “Kush mbjell armë, do të korrë refugjatë”, ka qenë motoja e këtij marshimi.

Këto aktivitete janë mbështetur nga organizata të ndryshme paqësore dhe kishat.