Maurer anulon vizitën në Rusi

Përveç këtij anulimi, që mund të konsiderohet i motivuar politikisht, Zvicra është përmbajtur nga marrja e masave politike ndaj Rusisë

Ministri zviceran i mbrojtjes, Ueli Maurer ka anuluar një vizitë të planifikuar më heret në Rusi. Ai ka nujoftuar homologun e tij rus, ministrin e mbrojtjes Sergei Schoigu se për shkak të “vështirësive me termine” nga të dyja anët detyrohet të heqë dorë nga shkuarja për vizitë në Rusi.

Por, siç shkruan gazeta “Sonntagszeitung”, ky anulim në fakt është reaksion ndaj politikës ruse në Ukrainë.

Vizita qe planifikuar fillimisht për muajin prill por për shkak të ngjarjeve në Ukrainë ajo qe shtyrë pas shpërthimit të krizës së Ukrainës. Gazeta nuk ka gjetur të dhëna lidhur me përmbajtjen e planifikuar të takimit tashmë të anuluar.

Ndryshe, përveç këtij anulimi, që mund të konsiderohet i motivuar politikisht, Zvicra është përmbajtur nga marrja e masave politike ndaj Rusisë.

Ministria zvicerane e Mbrojtjes ende nuk ka vendosur nëse do ta ndalojë pjesëmarjen e flotës së fluturakeve ushtarake ruse “Russian Knights” në spektaklin ajror që mbahet në fund të gushtit në Payerne.