Mbesin pa punë 3000 punëtorë të “Credit Suisse”?

Drejtori i ri i bankës zvicerane “Credit Suisse”, Tidjane Thiam, do të mund të shkarkojë rreth 3.000 të punësuar në sektorin e investimeve, që paraqet 15 për qind të stafit aktual.

Tidjane Thiam, ardhja e të cilit në krye të bankës zvicerane ka bërë bujë në opinionin e këtushëm, mund të heqë 2.900 vende pune, kështu që numri i vendeve të punës do të reduktohet në 16.500, për të zvogëluar shpenzimet, njofoti Kian Abuhosein, analist amerikan i bankës amerikane “JP Morgan”, raporton AFP.

Banka e dytë më e madhe e Zvicrës “Credit Suisse” e ka tashmë shef të ri afrikanin, gjegjësisht shtetasin e Bregut të Fildishtë, Tidjane Thiam. Eksperti i shquar i sigurimeve, i ardhur nga Britania e Madhe, do ta zëvendësojë amerikanin Brady Dougan që mbante këtë post nga viti 2007. Thiam ka drejtuar me shumë sukses koncernin e madh britanik të sigurimeve “Prudential”, ndërsa nuk ka përvojë në punë të drejtpërdrejtë me banka.