Mblidhen kravatat për kryeministrin

Deri tani ai ka mbledhur 204 sosh

Pas deklaratës së kryeministrit të Kosovës, Ramush Haradinaj se ‘e rriti pagën’ pasi që ‘i duhen edhe për kravata dhe këmisha’, ka pasur shumë reagime në Kosovë.

Kushtrim Mehmeti ishte njëri nga ata që nisi një ‘aksion humanitar’ për të mbledhur kravata dhe për t’ia dhuruar kryeministrit, përcjell albinfo.ch.

Deri tani ai ka mbledhur 204 sosh. “Aksioni humanitar i Kushtrim B Mehmetit për ta ndihmuar kryeministrin Haradinaj! Deri tani ai ka mbledhur 204 kravata të cilat nesër do ia dorëzoj kryeministrit”, ka njoftuar Mehmeti.

Haradinaj ka rritur pagën e tij për 100 %, dhe tani do të jetë njëri nga kryeministrat me pagën më të madhe në rajon. Paga e tij është 2950 euro bruto.

Kryeministri i Kosovës gjithashtu është kritikuar për numrin e madh të stafit të tij, me 22 ministra, 70 zëvendësministra, këshilltar të ministrave e zëvendësministrave.