Më pak aborte, sidomos në mesin e grave të reja

(KEYSTONE/Christian Beutler)

Vitin e kaluar në Zvicër janë kryer 10.255 aborte, 20 më pak se vitin e kaluar. Veçanërisht kanë rënë abortet te gratë e reja, adoleshentet.

Numri i përgjithshëm i aborteve ka regjistruar vitin e kaluar rënien e pestë radhazi. Kështu tregon Zyra Federale e Statistikave. Më 2010 ishin raportuar 11.000 aborte.

Abortet në vitin 2015 kanë prekur 727 vajza dhe gra të reja, mes moshës 15 dhe 19 vjeçe. Këto janë 89 aborte, ose 11 për qind më pak se në vitin 2014. Shumica e këtyre ndërhyrjeve kanë qenë vitin e kaluar në mesin e të rinjve nga Gjeneva (7.2) dhe Neuchâtel (4.8).

Gjeneva, së bashku me Vaud-in nga totali i grave rezidente në Zvicër kanë regjistruar normat më të larta të aborteve (11.9, respektivisht 8.8 në 1.000). Në vendin e tretë vjen Neuchâtel (7.6), ndjekur nga Zürich (7.4) dhe Basel-Stadt (6.7). Normat më të ulëta janë regjistruar në Zvicrën Qendrore.

Si në vitet e mëparshme, 95 për qind e aborteve janë bërë në 12 javët e para të shtatzënisë.