Medikamentet Ozempic dhe Mounjaro ulin rrezikun për disa lloje kancerësh

Studimi: Barnat kundër diabetit si Ozempic dhe Mounjaro ulin rrezikun për disa lloje të kancerit

Studime të shumta mbi medikamente si Ozempic dhe Mounjaro, fillimisht të zhvilluara për trajtimin e diabetit dhe më vonë të miratuara edhe për obezitetin, sugjerojnë se përfitimet e tyre shtrihen përtej këtyre indikacioneve. Këto barna mund të ndihmojnë në reduktimin e rrezikut për dhjetë lloje të kancerit, të ofrojnë mbrojtje kundër sëmundjeve kardiovaskulare dhe të veshkave, si dhe të ulin inflamacionin, transmeton albinfo.ch.

Një studim i fundit i publikuar në JAMA Network Open është i pari që sugjeron një lidhje mes përdorimit të agonistëve të GLP-1 dhe reduktimit të rrezikut për disa lloje të kancerit. Meqenëse individët obezë kanë një predispozitë më të lartë për zhvillimin e 13 llojeve të ndryshme të kancerit, ky hulumtim zbuloi se pacientët me diabet të tipit 2 që përdornin një ilaç agonist GLP-1 kishin rrezik më të ulët për 10 nga këto lloje, krahasuar me ata që trajtoheshin vetëm me insulinë.

Analiza përfshiu të dhënat shëndetësore të 113 milionë individëve nga 50 shtete dhe krahasoi rrezikun për zhvillimin e kancerit gjatë një periudhe 15-vjeçare te 1.65 milionë pacientë me diabet të tipit 2. Studiuesit u përqendruan te pacientët e trajtuar gjatë vitit 2018, kur ilaçet GLP-1 ishin ende të miratuara ekskluzivisht për diabetin, theksoi Lindsey Wang, studente në Universitetin Case Western Reserve.

Krahasimi midis pacientëve që përdornin vetëm insulinë dhe atyre që merrnin edhe një agonist GLP-1 tregoi se kjo terapi e fundit shoqërohej me një reduktim prej 65% të rrezikut për kancerin e fshikëzës së tëmthit dhe 62% për një tumor të sistemit nervor qendror të njohur si meningioma.

Gjithashtu, u konstatua një rrezik i reduktuar për kancerin e stomakut, ndërsa nuk u vu re ndonjë ndryshim i ndjeshëm në incidencën e kancerit të tiroides apo të gjirit pas menopauzës.