Mentori i vogël nga Gjakova “çon” në gjyq Weltwoche-n

Prokuroria publike e Cyrihut ka ngritur padi kundër “Weltwoches”, të cilën e ngarkon për shkelje të ligjit kundër racizmit

Revista javore e Zvicrës “Weltwoche” duket se nuk do të shpëtojë lehtë nga skandali i publikimit të fotografisë së vogëlushit rom të Kosovës.

Siç është shkruar tashmë, kjo javore në fillim të prillit kishte botuar në ballinën e saj një fotografi ku romi nga Gjakova, Mentori atëbotë 4 vjeçar “kërcënonte” me një revole (lodër). Këtë fotografi, Weltwoche e kishte prezantuar për të mbështetur tezën e saj se romëve “që nga fëmijëria u injektohet prirja për dhunë”.

Më vonë doli se fotografia e Mentorit të vogël ishte bërë nga një fotoreporter italian, i cili ishte revoltuar nga keqpërdorimi i fotografisë së tij për qëllime jo të ndershme. Përdorimi i tillë i fotografisë ka indinjuar edhe vetë familjen e Mentorit nga Gjakova dhe shumë organizata humanitare të cilat kanë reaguar ashpër.

Së fundi ka vepruar edhe prokuroria publike e Cyrihut. Ajo, sipas gazetës “Sonntags Zeitung” ka ngritur padi kundër “Weltwoches”, të cilën e ngarkon për shkelje të ligjit kundër racizmit.  Prokuroria reagon kështu ndaj një numri të denoncimeve që nga organizata dhe individë të ndryshëm ishin bërë pas publikimit të fotografisë së kontestuar.