Ministri i Arsimit nuk shkarkohet

Qeveria e Kosovës me anë të një komunikatë për media ka sqaruar se ministri i Arsimit, Shyqiri Bytyqi nuk do të shkarkohet. Kjo pas përjashtimit të Agjencisë së Akreditimit nga Regjistri Evropian i Sigurimit të Cilësisë, përcjell albinfo.ch.

“Qeveria e Republikës së Kosovës njofton opinionin se janë të pavërteta shkrimet e disa mediave  për shkarkimin e mundshëm të ministrit Arsimit, Shkencës dhe Teknologjisë, Shyqiri Bytyqi. Me këtë rast, Qeveria e Kosovës bënë me dije se ministri Bytyqi është duke vazhduar punën në përmbushjen e detyrave dhe obligimeve që i takojnë në pozitën e ministrit të Arsimit, Shkencës dhe Teknologjisë”, thuhet në komunikatë.

Përjashtimi i Kosovës nga kjo organizatë ndërkombëtare është cilësuar si një goditje e madhe për arsimin në Kosovë, derisa ishte kërkuar shkarkimi i ministrit.