Ministri i Punëve të Brendshme i Kosovës reagon pas protestës së Njësisë Speciale

Thotë se morën mbi dy mijë euro paga

Ministri i Punëve të Brendshme i Kosovës, Xhelal Sveçla, ka reaguar ndaj protestës së njësive elitare të Policisë së Kosovës.

“Me marrjen e mandatit, pjesëtarët e Njësive Speciale të Policisë së Kosovës i kemi gjetur pa uniforma, pa pajisje mbrojtëse për jetën e tyre, pa kushte të punës e me ushqim të mangët e jocilësor. Nga marrja e mandatit, deri në votimin e buxhetit për vitin 2024, kemi rritje për mbi 30% në buxhetin total të Policisë, përderisa, në investimet kapitale kemi rritje për 300%. Nga viti 2021, buxheti për pajisje operacionale është 21-fishuar. Në vitin 2021, buxheti ka qenë më pak se gjysmë milioni për pajisje operacionale, ndërsa këtë vit është mbi 9 milionë euro. Për ne, ka qenë gjithmonë synim përmirësimi i kushteve të punës, sigurimi i pajisjeve që mbrojnë jetën e zyrtarit policor si dhe trajtimi dinjitoz e i drejtë i tyre, teksa për dallim nga kohët e mëhershme, kur kompensimet për angazhimet shtesë nuk janë zbatuar fare, ne kemi kompensuar ato pa vonesa. Të ardhurat mesatare mujore gjatë këtij viti të zyrtarëve që protestuan sot janë mbi 2.200 euro”, shkruan Sveçla.

Ai falënderon “të gjithë zyrtarët e Ministrisë së Punëve të Brendshme, e veçanërisht të Policisë së Kosovës, për angazhimin dhe sakrificën drejt një shteti të drejtë dhe prosperues”, përcjell albinfo.ch.

---