Abazoviq për sulmin në veri: Kosova kishte paralajmëruar, ndërkombëtarët të marrin përgjegjësi

foto/ facebook/ Dritan Abazovic

Kryeministri i Malit të Zi, Dritan Abazoviq, ka folur sot për situatën mes Kosovës dhe Serbisë ndërsa u shpreh se Kosova kishte paralajmëruar se në veri ka kriminelë dhe ndërkombëtarët duhet të ndërhyjnë në këtë tension.

“Unë pres nga autoritetet e Kosovës dhe nga autoritetet e Serbisë, por dhe nga ndërkombëtarët. Ndërkombëtarët nuk munden me larë duart prej kësaj pune. Ka pasur shumë paralajmërime se atje ka njerëz që janë kriminelë dhe ka krim të organizuar. Ndërkombëtarët duhet të marrin përgjegjësinë e vet. Duhet të themi gjërat ashtu siç janë nëse duam të kemi ardhmëri”, u shpreh ai, raporton euronews.

Sa i përket deklaratës së kryeministrit të Shqipërisë, Edi Rama për praninë e KFOR-it në veri të Kosovës, ai u shpreh se çdo përpjekje e kryeministrit shkon për të patur paqe në rajon, përcjell albinfo.ch.

“Veprimet e tij dhe çdo aktivitet i madh, i tij ndërkombëtar për Ballkanin Perëndimor shkojnë në drejtim që ne si rajon të kemi paqe dhe të shkojmë drejt progresit. Nuk i takoj atyre politikanëve, i cili do të nisë veprime kritike ndaj Ramës pasi jam i bindur se çdo veprim i tij shkon në një drejtim, që të kemi një rajon në paqe”, deklaroi ai.