Mungesë e madhe e organeve për transplantim

Në vitin 2013 në krahasim me një vit më parë organet e tyre i kanë dhuruar 13 veta më shumë. Ndërsa në pritje për transplantimin e një organi kanë vdekur 72 persona

Personat të cilët në Zvicër presin për transplantim të një organi janë në një pozitë më të keqe se sa bashkëvuajtësit e tyre në vendet fqinje. Gjithsej janë 1300 veta, jeta e të cilëve varet nga vendimi i dikujt për të lënë në dispozicion (me testament ose drejtpërdrejt) një organ për transplantim. Për pasojë, çdo të tretën ditë në Zvicër vdes një person nga kjo listë.

Sipas asaj që ka publikuar të premten fondacioni zviceran që merret me këtë problematikë Swisstransplant, në Zvicër ka mungesë të madhe të organeve për transplantim.

Swisstransplant që koordinon dhurimin e organeve me transplantimin e tyre ka shkruar në një komunikatë për medie se megjithëkëtë, vitin e kaluar ka pasur një rritje të vogël të numrit të organeve të dhuruara për transplantim. Por, edhe më tutje, në krahasim me vendet fqinje Zvicra qëndron dukshëm më keq, (për rreth 50 për qind)  në këtë drejtim.

Si synim të saj, Swisstransplant ka vendosur të ngrejë ratën e dhuruesve të organeve nga 13.6 në 1 milion (të vdekur) sa është sot në 20 në 1 milion. Nëse kjo rritje arrihet atëherë Zvicra do të jetë në mesataren evropiane, shkruan swisstransplant.ch .

Në vitin 2013 në krahasim me një vit më parë organet e tyre i kanë dhuruar 13 veta më shumë. Por numri i organeve të transplantuara megjithatë ka mbetur i njëjtë me atë të vitit 2012, gjithsej rreth 470 raste. Ndërkaq, 73 rastet e vdekjes të personave që ishin në listë të pritjes obligojnë për më shumë angazhim në ngritjen e vetëdijes humane të njerëzve për të dhuruar organet e tyre për transplantim.