Nasuf Nuhiu, me mision humanitar në Shid të Kroacisë

Nasuf  Nuhiu, nga Stublla e Ultë e komunës së Vitisë, pati migruar  në Gjenevë të Zvicrës, gjatë viteve të nëntëdhjeta.

Ai aktualisht kryen funksionin e sekretarit sindikal në organizatën” UNIA” të Gjenevës.

Nuhiu nga bashkëkombësit e tij njihet edhe si aktivist i dalluar sportiv. Ai kohën e lirë e kalon duke ndarë drejtësi  në fushat e futbollit të Ligës së tretë rajonale të kantonit të Gjenevës.

Veçkësaj  jep ndihmën e tij edhe në Komunitetin Shqiptar të Gjenevës, ku dy mandate radhas është zgjedhur anëtarë i kryesisë  së kësaj Shoqate , jofitimprurëse  dhe  apolitike.

Kontribut  të vlefshëm  Nuhiu,ofron edhe në mbarëvajtjen e mësimit plotësues të Gjuhës Shqipe,duke qenë prej vitesh anëtarë i LAPSH –it të Gjenevës.

Mirëpo një tipar që atë  e dallon nga të tjerët është bamirësia. Ai çdoherë mundohet t’u dalë në ndihmë njerëzve me nevoja të veçanta.

Disaherë  Nuhiu nëpërmjet organizimeve sportive ka ndihmuar familjet skamnore të Anamoravës.

Ndihma e tij nuk ngelet vetëm në suaza lagjeje e regjioni ajo depërton  tek të gjithë njerëzit me probleme  ekonomike  e  shëndetësore.

Nuhiu, duke qenë  dikur edhe vetë pjesë e eksodit të dhimbshëm shqiptar në kampet e Bllacës së Maqedonisë,  vendos që gjatë këtyre ditëve të ftohta dimri t’u ofrojë dorën e ndihmës fëmijëve të ikur nga Siria, të cilët janë viktima të pafajshme të kësaj lufte të përgjakshme dhe të pakuptimtë.

Ai nëpërmjet organizatës  ndërkombëtare “ Remar Sos”, që aktivitet të vetëm ka humanitetin  tash sa ditë po ndihmon fëmijët e vendosur sirianë në kampet e qytetit  Shid të Kroacisë, të cilët më pas do të sistemohen  në  vendet e Evropës Perëndimore.

Nuhiu po bënë përpjekje  maksimale që këtyre fëmijëve të traumatizuar e në ankth  t’u vijë në ndihmë në çdo formë të mundshme.

Rrëfimet e këtyre fëmijëve janë  të lojllojshme   dhe rrëqethëse. Ata nëpërmjet  dhimbjes dhe vuajtjeve të rënda shpirtërore rrëfejnë vrasjet e prindërve, vëllezërve, motrave dhe të të afërmve të tyre.

Në këtë fazë  jashtëzakonisht  prekëse  shqetësimet e thella emocionale  të këtyre fëmijëve me tundim të rëndë të personalitetit presin dorën e ndihmës nga të gjithë ne  thotë  Nuhiu, i cili deri në mesin e muajit të ardhshëm do të jetë pranë këtyre fëmijëve  viktimë e sulmeve  të palëve ndërluftuese të cilat Sirinë,dikur  çerdhe të kulturës dhe  të antikitetit e hodhën në greminë.

Arif Ejupi