Ndahen katër milionë euro për ndërtimin e shtëpive të komuniteteve pakicë në veri

Albin Kurti, FB

Qeveria e Kosovës ka marrë vendim që të ndajë 4 milionë euro shtesë për subvencionimin e ndërtimit të shtëpive për pjesëtarët e komuniteteve pakicë në katër komunat në veri: Mitrovicë të Veriut, Zveçan, Leposaviq dhe Zubin-Potok.

Ministri i Financave, Hekuran Murati, ka thënë se kjo është një kërkesë shtesë për të përmbushur nevojat që kanë qenë gjatë fazave të mëhershme të aplikimit për ndërtim apo rindërtim të shtëpive nga komunitetet pakicë.

Qeveria në mbledhjen e mbajtur të martën ka miratuar edhe Projektligjin për ratifikimin e Marrëveshjes kornizë ushtarake ndërmjet Qeverisë së Kosovës dhe Qeverisë së Republikës së Turqisë, projektligjin për ratifikimin e marrëveshjes së kredisë në mes të Kosovës dhe Bankës Evropiane për Rindërtim dhe Zhvillim për projektin e trajtimit të ujërave të zeza në Ferizaj, Projektligjin për provimin e maturës shtetërore si dhe atë për ratifikimin e amendamentit numër një të marrëveshjes financiare në mes të Kosovës dhe Bashkimit Evropian për programin IPA 2020.