Në ditën e fundit: Januzaj kalon në Dortmund, Xhemaili në Genoa

Kur kanë mbetur edhe pak orë para përfundimit të afatit kalimtar të futbollistëve, bëhet e ditur se Adnan Januzaj dhe Blerim Xhemaili janë huazuar tek skuadra të reja, njofton “albinfo.ch”.

Derisa Januzaj nga Mançester United ka kaluar tek Borusia Dortmund për një sezon, Blerim Xhemaili nga Galatasaray është transferuar në Genoa të Italisë për dy sezone.

Mediet ndërkombëtare tashmë e kanë konfirmuar kalimin e Xhemailit në Genoa, ndërsa siç raporton gazeta bild.de, edhe marrëveshja mes Januzajt dhe Dortmundit tashmë ka përfunduar, përcjell “albinfo.ch”.

Shqiptari i përfaqësueses zvicerane, pas një sezoni në Galatasaray, është rikthyer sërish në kampionatin Italian. Xhemaili edhe në të kaluarën e tij kishte luajtur për Torinon, Parmën dhe Napolin.

Ndërkaq në anën tjetër Januzaj i cili luan edhe për kombëtaren belge duke mos pasur të garantuar paraqitjet e tij tek klubi anglez, pritet të dëshmojë aftësitë e tij në bundesligën gjermane.

Një transferim tjetër i cili është bërë gjatë këtyre ditëve është edhe i Albion Avdiajt i cili pas një sezoni të kaluar në Gjermani, te skuadra e dytë e Wolfsburgut, tashmë ka zyrtarizuar kalimin e tij në kampionatin zviceran,Vaduz.

“Transferimi u realizua me sukses, jam gati për sfidën e re”, ka njoftuar vet futbollisti në “Facebook”.

Avdiaj I cili luan edhe për shpresat e Shqipërisë gjatë sezonit 2013/14 mbronte ngjyrat e klubit të Cyrihut, FC Grasshopers.

---