Në kuadër të fillimit të muajit rozë, Prishtina organizon fushatën vetëdijesuese “Race for the Cure 2023”

Foto FB: Alban Zogaj

Në fillm të muajit rozë, sot në Prishtinë është organizuar fushata vetëdijesuese “Race for the Cure 2023”, me qëllim të ndërgjegjësimit të qytetarëve kundër sëmundjes së kancerit të gjirit.

Komuna e Prishtinës u mundëson të gjithë qytetarëve të Kosovës që të bëjnë mamografinë falas.

Kryetari i kryeqytetit të Kosovës, Përparim Rama u bëri thirrje të gjithë qytetarëve të Kosovës që të bëjnë mamografinë në mënyrë që sëmundja të zbulohet më herët, shkruan albinfo.ch.

“Së bashku me doktorin tash i kemi tre mamografë, kemi mundësi të shumta për secilin qytetarë, për gra dhe meshkuj që të shkojnë të shohim se a kemi probleme, pra ta luftojmë luftën, sepse nëse mamografia tregon këto pjesët e para të kancerit, nëse kapet në atë kohë, sëmundja mund të shërohet. I lus të gjithë qytetarët e kryeqytetit dhe jo vetëm. Ne si kryeqytet po i hapim këto mundësi, edhe për komunat përreth po edhe për të gjitha komunat e Kosovës”, tha Rama.

Drejtori i Klinikes së Onkologjisë në Qendrën Klinike Universitare të Kosovës, Ilir Kurtishi është shprehur se numri i grave të prekura me sëmundje të gjirit, po shënon rritje në Kosovë, derisa theksoi se deri në fund të këtij viti, numri mund të arrijë deri në 450.

Ndryshe, “Race for the Cure” është fushatë që organizohet në 140 vende të ndryshme të botës.