Në Mitrovicë ndërtohet xhamia më e madhe në Kosovë

Në vend të xhamisë “Isa Beg”, që gjendet në qendër të Mitrovicës, e cila është gjatë vitit 1999, do të ndërtohet xhamia e re, më e madhja dhe më moderne në Kosovë.

Xhamia do të ndërtohet me donacion të Komunës Bajram Pasha të Stambollit të Turqisë.

Sipas paralajmërimeve të myftiut të Komunës Bajram Pasha të Stambollit, Izet Shener, xhamia do të ketë rreth 2.500 metra katrorë hapësirë të shfrytëzueshme, përfshi edhe hapësia për mësim-besim. Xhamia do të ketë edhe dy minare me lartësi prej 48 metra. Punët në realizimin e këtij projekti pritet të fillojnë së shpejti, ndërsa përfundimi i xhamisë në tërësi shpresohet të bëhet brenda afatit dyvjeçar.

Gjatë qëndrimit në Mitrovicë, myftiu Shener ka thënë se ndjehet mirë që gjendet në Mitrovicë, komunë kjo me të cilën, në aspektin fetar, komuna e Bajram Pashës në Stamboll mbanë kontakte vëllazërore. Ai ka thënë se ka ardhur në Mitrovicë me bashkëpunëtorët e tij për ta prezantuar projektin për ndërtimin e një xhamie të re në qendër të qytetit, që do të jetë xhamia më e madhe që ndonjëherë ka pas Kosova.

“Kemi sjell me vete edhe projektin e xhamisë të bërë gati nga ekspertët tanë, me qëllim që edhe ju të jepni pëlqimin tuaj dhe të përgatisni në afatin sa më të shkurtër të mundshëm kohor lejet përkatëse dhe të na ndihmoni për disa çështje përgatitore për fillimin e menjëhershëm të punëve në realizimin e projektit”, ka thënë Shener.

Ndërsa kryetari i Mitrovicës, Avni Kastrati ka thënë se pushteti lokal i kësaj komune është vëllazëruar me dy komuna të tjera të Turqisë dhe ka një bashkëpunim shumë të mirë edhe me komuna të tjera, të cilat po ashtu kanë ofruar ndihmë në forma të ndryshme.