Në ora 11:30, votimi i Kosovës në UNESCO

UNESCO ka 195 shtete anëtare, ndërsa për ta siguruar anëtarësimin, Kosovës i duhet t’i sigurojë dy të tretat e votave të asamblesë

Përpjekja disamujore e diplomacisë kosovare për anëtarësim në UNESCO dhe lufta e Serbisë për ta parandaluar këtë, kanë ardhur deri në fund. Të hënën në 11:30 në Paris, Konferenca e Përgjithshme e UNESCO-s, pritet të votojë për pranimin e Kosovës në këtë organizatë. Deri në kohën e votimi, po bëhet luftë e ashpër ndërmjet dy taborëve për çdo votë eventuale.

UNESCO ka 195 anëtarë, ndërsa për ta siguruar anëtarësimin, Kosova duhet të sigurojë dy të tretat e votave të anëtarëve të pranishëm në sallë. Kjo nënkupton, se shtetet anëtare që abstenojnë nuk njihen votat, por vetëm ato që votojnë për dhe kundër. E nëse votojnë të gjitha, atëherë pro-Kosovës duhet të jenë 130 shtet.

Mediet në Kosovë raportojnë për një luftë të ashpër të Serbisë dhe Rusisë kundër Kosovës, të cilat po i shfrytëzojnë si armë, trazirat e 17 marsit 2004, ku u demoluan disa objekte fetare ortodokse.

Ndërsa Kosova dhe aleatët e saj, SHBA dhe shtetet evropiane, po lobojnë pro anëtarësimit të Kosovës në UNESCO.  Megjithatë deri në momentin e fundit, thuhet se gjithçka është e paqartë. Këtë e thotë edhe ministri i Punëve të Jashtme të Serbisë, Ivica Daçiq. ”Për anëtarësimin e Kosovës në UNESCO do të mund të vendosin një numër i vogël votash dhe se rezultati është i paqartë”, tha ai.

Edhe zëvendëskryeministri dhe ministri i Punëve të Jashtme, Hashim Thaçi, thotë se ai është “optimist i matur” për votimin e nesërm për Kosovën në UNESCO. Ai thotë se Kosova ka bërë maksimumin për anëtarësim në UNESCO dhe beson se nesër kjo çështje do të kalojë.

“Ne kemi bërë maksimumin e asaj që duhet të bëhet. Kemi bashkëpunuar me partnerët tonë ndërkombëtare. Jam optimist i matur, me përgjegjësi të plotë, me optimizëm racional, me besim se do të kalojmë. Natyrisht se kemi pasur të bëjmë me një fushatë agresive të koordinuar të oponentëve të pavarësisë dhe me qëndrime raciste të Serbisë”, ka thënë Thaçi.