Në qershor Kosova i vë doganë Serbisë

Masat e reciprocitetit me Serbinë dhe Bosnjën, duhet të përcillen me masa lehtësuese nga institucionet e Kosovës

Për shkak të shkeljes së Marrëveshjes për Tregti të Lirë në Evropën Qendrore (CEFTA), Kosova, si vend anëtar i këtij mekanizmi rajonal, do të vejë taksa doganore për prodhimet e Serbisë që pikat doganore të Kosovës.

Ministrja e Tregtisë dhe Industrisë (MTI), Mimoza Kusari-Lila bëri të ditur sot se është takuar me importuesit e prodhimeve nga Serbia dhe ka biseduar në lidhje me pasojat e vendimit eventual për vënie të doganës për mallrat e importuara nga Serbia dhe Bosnja e Hercegovina.

Ajo tha se problemet e bllokadës që janë bërë kanë rënduar mbi ekonominë e Kosovës, e në veçanti ka prekur prodhuesit kosovarë. Sipas saj, humbësit kryesorë për këto masa do të jenë eksportuesit serbë dhe të tjerët pasi në anën tjetër ata kosovarë nuk kanë mundur të eksportojnë për arsye të mos njohjes së vulave të UMNIK-ut, si nënshkrues i marrëveshjes së CEFTA-s.

“Si pasojë e kësaj ekonomia e Kosovës nuk mund të vazhdojë të paguaj faturën e humbjeve dhe deficiteve tregtare”, ka thënë ministrja Kusari-Lila.

Por, përfaqësuesit e bizneseve që importojnë nga Serbia dhe Bosnja e Hercegovina, thanë se masat e reciprocitetit që do të aplikohen me Serbinë dhe Bosnjën e Hercegovinën, duhet të përcillen me masa lehtësuese sa i përket politikës fiskale dhe masave tjera nga institucionet e Kosovës.