Nedim Bajrami vazhdon kontratën me Grasshopper

Futbollisti shqiptar ka vazhduar kontratën me Grasshopper edhe për katër vitet e ardhshme

Foto nga Facebook

Njëri nga futbollistët më të talentuar shqiptar në Zvicër është Nedim Bajrami. Skuadra zvicerane Grasshopper ka njoftuar se bashkëpunimi do të vazhdojë edhe më tutje, raporton albinfo.ch.

Ai kishte kaluar në të gjitha grupmoshat e Grasshopperit. Bajrami kishte debutuar më 4 shkurt të këtij viti kundër Thunit. Futbollisti shqiptar po shkëlqen për skuadrën e parë, derisa edhe këtë sezon ka treguar formë të mirë.

“Jam shumë i lumtur që Nedim ka vazhduar kontratën me GC për një afat më të gjatë. Është e rëndësishme për të ardhmen tonë që ne mund të trajnojmë mirë talentet tona dhe pastaj t’i integrojmë ata në ekipin tonë. Kjo është mënyra jonë”, është shprehur drejtori sportiv i Grasshopper, Mathias Walther për zgjatjen e kontratës me Nedim Bajramin.

Nedim Bajrami ka lindur në Tetovë të Maqedonisë. Ai është 18-vjeçar dhe luan në pozitën e mesfushorit sulmues. Nedimi gjithashtu ka luajtur për Zvicrën U15, U16, U17, U18 dhe U19.