Nëpërmjet tortës, tentojnë t’i fusin celularët në burg

Para se “ëmbëlsira” të shkoj në destinacionin e duhur, u identifikua nga rojet e burgut dhe doli të ishte më shumë se tortë. Në të ishin fshehur dy telefona celularë

Një tortë që ishte përgatitur për ditëlindje për t’ia dërguar një të afërmit në Burgun e Dubravës, doli të ishte dhurata më e çmueshme për të burgosurin. Mirëpo para se “ëmbëlsira” të shkoj në destinacionin e duhur, u identifikua nga rojet e burgut dhe doli të ishte më shumë se tortë. Në të ishin fshehur dy telefona celularë.

Personat që tentuan t’i dhurojnë tortën të afërmit në burg, u arrestuan nga Policia e Kosovës dhe me vendim të prokurorit të njëjtit janë liruar në procedurë të rregullt. Sipas raportit të Policisë së Kosovës, janë dy të dyshuar që janë përfshirë në këtë rast.

“Janë arrestuar dy të dyshuar meshkuj (shqiptarë të Kosovës), pasi kanë kanë tentuar që t’ia japin dy telefona celularë përmes një torte, një të afërmi në Qendrën Korrektuese të Dubravës”, thuhet në raportin e Policisë.

Ndryshe, Qendra më e madhe korrektuese e Kosovës, ajo në Dubravë disa herë ka qenë në fokus të kontrabandimit me telefona celularë, drogë dhe gjësende të tjera. Madje në arratisjen spektakolare që ndodhi para disa vitesh, njëri nga të burgosurit kishte siguruar edhe revolver brenda burgut.