Nga nesër Trafiku Urban pa pagesë në Prishtinë

Autobusët pa pagesë do të jenë ata që do të stacionohen në pikat më të frekuentuara të Prishtinës

Që nga dita e nesërme shërbimi i Trafikut Urban do të jetë pa pagesë në Prishtinë, si masë për parandalimin e ajrit.

Këtë e ka konfirmuar zyrtari për komunikim në Komunën e Prishtinës, Adonis Tahiri për emisionin “Prite të Gjelbrën” të RTV21, përcjell albinfo.ch.

Autobusët pa pagesë do të jenë ata që do të stacionohen në pikat më të frekuentuara të Prishtinës.

Subvencionimi i Trafikut Urban për këtë shërbim bëhet nga ana e Qeverisë së Kosovës.

Ky vendim është marrë si rezultat i masave emergjente për uljen e nivelit të ndotjes së ajrit, me ç’rast nga nesër do të bëhet reduktimi i numrit të makinave që qarkullojnë në kryeqytet, qoftë përmes ndaljes të të gjitha makinave që vijnë nga qytetet tjera, qoftë përmes seleksionimit të qarkullimit të makinave varësisht numrit të targave në të gjithë qytetin e Prishtinës.

Nga Komuna e Prishtinës kanë bërë të ditur se do të sigurohen hapësira për parkim në hyrje të kryeqytetit, derisa të tejkalohet kjo fazë emergjente.