Ngrihet alarm për mundësinë e zjarreve në Kosovë

Ilustrim, Agjencia e Menaxhimit Emergjent

Agjencia e Menaxhimit Emergjent në Kosovë ka dalë me apel për qytetarët e Kosovës. Duke pasur parasysh temperatura e larta që mbizotërojnë dhe pritet të vazhdojnë edhe javët e ardhshme, mundësia e shfaqjes së zjarreve është e lartë.

“Meqenëse kemi hyrë në sezonin e verës që supozohet se do të karakterizohet me temperatura të larta të ajrit, të cilat ndikojnë në rritjen e rrezikut për shfaqjen dhe zgjerimin e vrullshëm të zjarreve në sipërfaqe të hapura, malore dhe fushore, e me qëllim të evitimit të rrezikut nga zjarri, mbrojtjes të jetës së qytetarëve, të pronës, shtazëve dhe ambientit”, thuhet në njoftimin e AME-së.

Tutje u kërkohet qytetarëve të jenë të kujdesshëm gjatë kësaj kohe.

“APELOJMË, të jemi të gjithë të kujdesshëm dhe vigjilent për shmangien e të gjithë shkaktarëve të mundshëm të zjarrit, vërejtjen dhe lajmërimin me kohë në numrat emergjentë, si dhe të ndihmojmë në shuarjen e zjarrit kudo që ai mund të paraqitet dhe kërcënon, pasi që për një veprim të tillë, përveç tjerash, na obligon edhe Kushtetuta e Republikës së Kosovës si dhe aktet e tjera ligjore dhe nënligjore. Vlen të theksohet dhe t’iu bëhet e ditur se zjarrvëniet e qëllimta, si dhe ato të shkaktuara nga pakujdesia, janë vepër penale, të cilat sanksionohen me ligj”, bën të ditur AME, përcjell albinfo.ch.