Nis kampanja informuese për vulën apostile

Kampanja mediale, sipas MPJ-së, ka për qëllim, gjithashtu, që t’i ndihmojë shtetasit e Kosovës që të mos humbasin kohë dhe të mos shpenzojnë buxhet duke u drejtuar nëpër institucione të tjera por të drejtohen në MPJ

Ministria e Punëve të Jashtme e Republikës së Kosovës, ka filluar kampanjën informuese lidhur me përdorimin e vulës apostile. Përdorimi i kësaj vule nga MPJ është vlerësuar nga ministri i Jashtëm, Enver Hoxhaj, një betejë e madhe që Kosova të jetë pjesë e Konventës së Apostiles, pasi që është dashur të sigurohen votat e shumë shteteve anëtare të kësaj Konvente.

“Kjo është  dëshmia më e mirë që ne nuk bëjmë përpjekje që të anëtarësohemi vetëm në konventa dhe organizata ndërkombëtare por bëjmë përpjekje që ta ushtrojmë sovranitetin dhe ushtrimi i sovranitetit ka të bëjë me benificione konkrete që qytetarët e Kosovës mund t’i përfitojnë”, ka thënë Hoxhaj.

Kjo kampanjë bëhet me qëllim të informimit të qytetarëve se cilat dokumente mund të marrin vulën apostile në MPJ.

Kampanja mediale, sipas MPJ-së, ka për qëllim, gjithashtu, që t’i ndihmojë shtetasit e Kosovës që të mos humbasin kohë dhe të mos shpenzojnë buxhet duke u drejtuar nëpër institucione të tjera por të drejtohen në MPJ.

Dokumentet që vulosen në MPJ janë: Certifikatë nën Hetime lëshuar nga Gjykatat Themelore; vërtetime të lëshuar nga institucionet qendrore dhe lokale; vërtetime që nuk kanë  obligime tatimore lëshuar nga ATK; vërtetime për të kaluarën kriminale lëshuar nga Stacionet Policore; aktvendime; konfirmim-vërtetime; certifikatë shëndetësore, diploma, dëftesa, vërtetime lëshuar nga shkollat, deklarata të dhëna para noterëve, autorizime, kontrata, përkthime, vërtetim për të kaluarën kriminale, pëlqime, certifikata-diploma të shkollave profesionale, vendime të lirimit nga shtetësia e RKS-së, vërtetime për patentë shoferë, certifikata të regjistrimit të biznesit, informatat e biznesit, certifikata e TVSH, si dhe dokumente të vulosura në Odën Ekonomike të Kosovës.