Një delegacion i FMN-së do të qëndrojë në Kosovë për dy javë

Një delegacion i Fondit Monetar Ndërkombëtar të martën nis vizitën përfundimtare vlerësuese për qëndrueshmërinë fiskale në Kosovë.

Zyrtarë të Qeverisë presin vlerësim pozitiv, që do të çojë në arritjen e programit të ri “Stand Bye”, përmes të cilit, sivjet do të mund të përfitojnë 92 milionë euro për buxhetin e Kosovës.

“Pas përfundimit të këtij vlerësimi normalisht që hapet rruga edhe për bisedime për programin e ri me FMN-në Stand Bye, përmes të cilit ne kemi planifikuar dhe projektuar që në buxhetin e këtij viti të kemi një shumë prej FMN-së prej 92 milionë euro”, ka deklaruar për Radio Kosovën, Menderes Ibra, këshilltar i Ministrit të financave.

Marrëveshja 18 mujore “Stand Bye Arrangment” mes FMN-së dhe Qeverisë së Kosovës ishte miratuar nga Bordi i FMN-së në korrik të vitit 2010, por ishte prishur një vit më vonë për shkak të devijimit të Qeverisë nga programi, respektivisht rritjes së pagave në sektorin publik, pa pëlqimin e këtij misioni./albinfo&radiokosova/