Një i vdekur dhe dy të plagosur në Mitrovicë

Rasti ka ndodhur mëngjesin e hershëm të së dielës, rreth orës 01, në rrugën "Kolashini" përkatësisht në zonën e "Tre rrokaqiejve"

Një shqiptar 38 vjeç, ka mbetur i vdekur nga një sulm me mjet shpërthyes, në banesën e tij në veri të Mitrovicës, njofton Policia e Kosovës. Rasti ka ndodhur mëngjesin e hershëm të së dielës, rreth orës 01, në rrugën “Kolashini” përkatësisht në zonën e “Tre rrokaqiejve”, raporton Radio Evropa e Lirë.

Mjeti eksplodues, që besohet të jetë një sasi e eksplozivit plastik, mendohet të ketë qenë vendosur dhe aktivizuar në parmakun e dritares së banesës në katin përdhes të familjes Haradinaj, ndërsa në këtë sulm, plagë vdekjeprurëse ka marrë viktima S.H. (1974), kurse janë lënduar bashkëshortja dhe katër fëmijët e tij, të cilët janë trajtuar në spitalin e Mitrovicës.

Në njoftim, thuhet se njësitë përkatëse të Policisë së Kosovës kanë bërë sigurimin e vendit të ngjarjes, ndërsa hetuesit policorë janë duke kryer ekzaminimin e vendit të ngjarjes nën udhëheqjen e Prokurorit Publik.

Deri në këto momente nuk është raportuar për persona të arrestuar apo të dyshuar si kryes të këtij akti, ndërsa sektori i hetimeve të krimeve serioze në Mitrovicë, është duke ndjekur hetimet për të sqaruar rrethanat dhe motivet e rastit, thuhet në njoftimin e Poilicisë së Kosovës.