Një i vdekur dhe tre të plagosur në Skenderaj

Një person 39-vjeçar ka vdekur dhe tre të tjerë kanë mbetur të plagosur nga të shtënat me armë zjarri në një kafiteri në fshatin Runik të Skënderajt.

“Rreth orës 01:21, të datës 10 gusht 2023, policia ka marrë informatën për të shtëna me armë zjarri në një kafiteri në fshatin Runikë të Skenderajt. Menjëherë në vendin e ngjarjes kanë dalë njësitet e nevojshme policore dhe ekipi mjekësor. Bazuar në hetimet  fillestare, nga arma e zjarrit lëndime kanë pësuar katër persona, njëri nga të lënduarit viktima N. L., 39 vjeçar, ka ndërruar jetë në vendngjarje, ndërsa, tre persona të tjerë të lënduar ( po ashtu nga arma e zjarrit ) janë dërguar për tretman mjekësor në QKUK”, thuhet në njoftimin e Policisë së Kosovës.

Tutje bëhet e ditur se dy persona të maskuar kanë shtënë mbi disa persona në lokalin në fjalë dhe mbeten në arrati.

“Nga hetimet  e para dhe këqyrja e vendit të ngjarjes,  dyshohet  se dy persona të dyshuar e të maskuar kanë hyrë brenda në kafiteri  kanë shtënë  me armë dhe  janë larguar në drejtim të panjohur. Në cilësi të provave materiale në vendin e ngjarjes janë  gjetur dhe konfiskuar disa gëzhoja”, thuhet tutje në njoftim, përcjell albinfo.ch.

Prokuroria thotë se është duke i vazhduar hetimet.