Nuk paraqitet fituesi i 157 milionë frangave në loto

Pak para Krishtlindjeve, çmimi i EuroMillions ishte qëlluar në kantonin e Cyrihut me rreth 157.1 milionë franga.

Deri më sot, fituesi i ri EuroMillions ende nuk ka kontaktuar “Swisslos”, përfaqësuesin zviceran të Euro Millions. Siç raportohet nga “Neue Zürcher Zeitung”, kjo nuk ndodh për herë të parë, sipas Willy Mesmer, zëdhënës i medias për “Swisslos”, shkruan albinfo.ch.

Deri tash kishte ndodhur disa herë kur dy ose tre muaj fituesi nuk ishte paraqitur për të marrë paratë. Por normalisht, shumica e njerëzve do të kontaktojnë zyrën në Bazel brenda një jave.

Mesmer konfirmon se bileta e lotarisë është depozituar në një pikë të shpërndarjes në kantonin e Cyrihut. Pika e saktë e dorëzimit të kuponit nuk do të bëhet publike, edhe nëse “Swisslos” di për këtë.

Përveç kësaj, Mesmer rekomandon fituesin të kontaktojë “Swisslos” me telefon. Nëse fituesi nuk lajmërohet deri në korrik, çmimi nuk do të ndahet më për të.