Opozita artistike

Nga e marta, në Berlin po qëndron e hapur ekspozita personale e Rrezeart Galicës

Artisti Galica është i ftuar nga shoqata südost Europa Kultur (Kultura e Evropës Juglindore).

Nuk ishte e rastësishme që ekspozita u ndoq nga mysafirë të fushave të ndryshme, si politika, ekonomia dhe arti, sepse Galica preokupohet prej disa vitesh me stagnimin dhe depresionin politik që mbretëron në Kosovë. Punimet e tij janë qëndrime të qarta dhe ato kanë mundur të shihen edhe në demonstratat e mbajtura në Kosovë, si slogane të opozitës.

Regjimi i vizave dhe prostitucioni bëjnë pjesë në realitetin e vrazhdë të shoqërisë së re kosovare. Prania ndërkombëtare, sipas Galicës, ka pasur ndikim të madh në fenomenet e tilla. Këtë e tregon edhe vepra “EUSEX” (Europian Union Rule of Sex Mission). Që është një aludim i qartë për EULEX-in (European Union Rule of Law Mission).

Punimet e tij janë provokuese dhe kuptimplota. Përmbajtja dhe kuptimi i punimeve të tij mund të jenë edhe të diskutueshme por pikërisht kjo e bën ekspozitën të vlefshme për tu shikuar.

Për të gjithë ata që nuk duan të udhëtojnë shumë larg, Rrezeart Galica planifikon ekspozita edhe në vende tjera të Evropës.

© Rrezeart GALICA – GIQI: Pushtimi i mediave, 2009