ORCA: Kuvendi duhet t’i emërojë anëtarët e KSHC-së

Organizata studentore ORCA i ka bërë thirrje Kuvendit të Kosovës që ta trajtojë me urgjencë emërimin e anëtarëve të Këshillit Shtetëror të Cilësisë, i cili do të diskutohet në Kuvend.

ORCA rikujton se vetëm pas 3 ditësh, më 19 prill, Asambleja e Përgjithshme e ENQA-s do ta shqyrtojë rastin e Kosovës, statusi i së cilës është propozuar të zbritet nga “anëtar” në “anëtar nën shqyrtim”, përcjell albinfo.ch.

“Mosemërimi me kohë i anëtarëve të Këshillit Shtetëror të Cilësisë të Agjencisë së Kosovës për Akreditim, mund të sjellë pasoja për agjencinë, ndërkaq emërimi dhe përgatitja e mirë e mbrojtjes mund ta evitojë dëmin e mëtutjeshëm për agjencinë, institucionet e arsimit të lartë dhe studentët e tyre. ORCA konsideron se hartimi i udhëzimit administrativ për emërimin e këtyre anëtarëve, ku ka qenë e përfshirë shoqëria civile dhe spektri politik opozitar, si dhe përzgjedhja e anëtarëve nga një komision, ku po ashtu ka marrë pjesë shoqëria civile, kanë qenë transparente dhe në përputhje me standardet evropiane të kërkuara në dokumentet e ENQA-s dhe EQAR-it. Prandaj, ORCA konsideron se nuk ka arsye për vonesa të mëtutjeshme dhe se vendimi për emërimin e anëtarëve të KSHC duhet të merret para 19 prillit, që është një datë e rëndësishme për Agjencinë e Kosovës për Akreditim”, thuhet në thirrjen e kësaj organizate.