Organizimi i zbehtë për festimin e pavarësisë

Organizimi i zbehët për festimin e trevjetorit të pavarësisë së Kosovës. Koncentrimi i madh i partive për formimin e koalicionit qeverisës, ka bërë që institucionet të lënë anash pak organizimin e festës së pavarësisë.

Drejtuesit e  Lëvizjes “FOL”, thanë se mungesa e institucioneve do të reflektojë veçmas në prag të përvjetorit të tretë të shpalljes së pavarësisë së vendit, duke përçuar mesazhe jo të mira për ndërtimin e demokracisë dhe funksionimin e shtetit të së drejtës në Kosovë.

Ndërkohë, i vetmi organizim shtetëror për shënimin e trevjetorit të pavarësisë së Kosovës është një ceremoni që Presidenca e quan shtetërore në Hotelin Grand në darkën e 16 shkurtit.

Zëdhënësi i Presidencës, Fehmi Mehmeti, thotë se me rastin e trevjetorit të shpalljes së pavarësisë së Republikës së Kosovës, Ushtruesi i Detyrës së Presidentit të Republikës së Kosovës, Jakup Krasniqi, organizon ceremoninë shtetërore të shënimit të trevjetorit të shpalljes së pavarësisë.

“Në këtë ceremoni janë ftuar që të marrin pjesë përfaqësues të institucioneve vendore dhe ndërkombëtare, kori diplomatik i akredituar në vendin tonë, përfaqësues të partive politike, personalitete të shquara të vendit si dhe përfaqësues të shoqërisë civile dhe të medieve”, ka thënë ai.

Pos kësaj në të gjitha komunat e vendit do të organizohen koncerte dhe ekspozita të ndryshme. Biblioteka Kombëtare dhe Universitare e Kosovës me rastin e 3-vjetorit të Shpalljes së Pavarësisë ka organizuar dy ekspozita: Ekspozita e fotografive të 17 shkurtit 2008, Dita e Shpalljes së Pavarësisë të autorit Adnan Ruhani dhe Ekspozita e pikturave, skulpturave, grafikave dhe dizajnit të studentëve të Fakultetit të Arteve të Universitetit të Prishtinës të autorëve Refki Raci, Valdrin Seniku, Besart Smakiqi, Besnik Hasanaj, Ilir Krasniqi etj.

Zëdhënësi i Qeverisë së Kosovës, Memli Krasniqi, ka deklaruar se krijimi i koalicionit ka ndikuar që Kryeministria të mos mund të organizoj një eveniment për tre vjetorin e pavarësisë. Ai ka njoftuar se  me 17 shkurt filarmonia e Kosovës do të mbajë koncert të organizuar nga Ministria e Kulturës.