Osmani para zgjedhjeve, thirrje për serbët

Të dielën qytetarët e Kosovës votojnë për kryetar në katër komunat veriore të vendit. Presidentja e Kosovës, Vjosa Osmani, u ka bërë thirrje serbëve të dalin masivisht në zgjedhje. “E kuptoj që shumë prej jush keni qenë cak i kërcënimeve dhe frikësimeve që janë bërë javët e fundit nga struktura kriminale me mbështetje të Beogradit, me qëllim që t’ju detyrojnë të hiqni dorë nga zëri dhe fuqia juaj për ta formësuar të ardhmen e komunave tuaja. Megjithatë, dua t’ju siguroj se të gjitha institucionet e Kosovës po bëjnë gjithçka për të siguruar që këto zgjedhje të jenë të lira dhe të ndershme dhe që siguria juaj të jetë e garantuar”, thuhet në komunikatë, përcjellë albinfo.ch.
Ajo serbëve u ka thënë t’i refuzojnë kërcënimet e shantazhet e të përcjellin një mesazh me daljen në zgjedhje. “Prandaj, ju bëj thirrje që të refuzoni ata që vijnë te ju me kërcënime dhe shantazhe. Ju inkurajoj që ta dërgoni një mesazh të fortë dhe të qartë me pjesëmarrjen tuaj në zgjedhjet lokale të 23 prillit 2023. Sigurohuni që zëri juaj të dëgjohet këtë të diel, nëpërmjet votës së lirë e demokratike. Mbi të gjitha, pjesëmarrja juaj në zgjedhje do t’u dërgojë një mesazh të fortë atyre që kërkojnë t’ju frikësojnë dhe shtypin, se nuk do të mund t’ju heshtin dhe se zyrtarët e zgjedhur nga ju do t’ju shërbejnë juve dhe interesit të të gjithë qytetarëve të komunës”, përcjellë albinfo.ch.
Në veri janë hapur vetëm gjashtë qendra të zakonshme votimi, 13 prej tyre do të jenë alternative, kontejnerë.