Pacolli lobonte që PTK-ja t’i jepet këshilltarit të tij

Presidenti i Kosovës Behgjet Pacolli, në gushtin e vitit të kaluar, duke kundërshtuar mënyrën e privatizimit të Postë-Telekomit të Kosovës (PTK), kishte ofruar si alternativë që PTK-ja t’i jepej nën menaxhim partnerit të tij të biznesit Esad Puskar.

Këshilltari i presidentit Pacolli, përveç që është pronar i firmës italiane “Mabco”, është përfaqësues në tregun ndërkombëtar i “London Capital Market”, një institucion financiar me bazë në Londër, të cilin vitin e kaluar presidenti aktual e kishte prezantuar si biznes të cilit duhej dhënë nën menaxhim PTK-në.

Ideja e tij ishte kundërshtuar nga Qeveria e kaluar. Oferta alternative e Pacollit, sipas tyre, nuk ishte më e favorshme se sa mbledhja e 300 deri në 600 milionë eurove nga shitja e 75 për qind të aksioneve të VALA-s e PTK-së, shkruajnë sot mediat kosovare.

Pacolli e kishte menduar si ofertë për Qeverinë që LCM-ja e partnerit të tij të biznesit dhe këshilltarit të tij Pushkar t’i jepte një kredi prej 400 milionë eurosh Qeverisë, në shkëmbim të menaxhimit të PTK-së për një periudhë prej gjashtë vjetësh.

Për këtë i kishte dërguar letër Qeverisë, ndërsa publikisht mundësinë e marrjes nën menaxhim të PTK-së nga ky institucion financiar e kishte prezantuar zëvendëspresidentja e AKR-së, Mimoza Kusari-Lila, shkruar sot Koha Ditore.