Paraburgosen huliganët që sulmuan Ziadin Selën

Ata (babë e birë) akuzohen për tentim-vrasje ndaj deputetit shqiptar, me datën 27 prill, kur qindra huliganë hynë dhunshëm në Parlamentin e Maqedonisë dhe sulmuan ligjvënësit

Gjykata Penale në Shkup ua ka shqiptuar masën e paraburgimit prej 30 ditësh, dy huliganëve maqedonasve, babë e birë, që sulmuan deputetin shqiptar Ziadin Sela. Ata akuzohen për tentim-vrasje ndaj deputetit shqiptar, me datën 27 prill, kur qindra huliganë hynë dhunshëm në Parlamentin e Maqedonisë dhe sulmuan ligjvënësit.

Sipas mediave lokale ne Maqedoni, të dyshuarit Kire Gjorgjievskin dhe babai i tij, janë në burgun hetues. Ata fillimisht ishin nën hetime si “pjesëmarrës në turmë”, ndërsa tani, Prokuroria Themelore Publike e ndërroi vendimin duke i akuzuar për “tentim-vrasje”.

“Prokurori miratoi urdhrin për zbatimin e procedurës hetuese kundër dy personave për veprën penale tentim për vrasje. Njëherësh, sipas vlerësimit të Prokurorisë Publike, kundër të dyshuarve është e domosdoshme të shqiptohet masa për sigurimin e tyre, për çka prokurori publik deri te gjykatësi në procedurë paraprake parashtroi Propozim për përcaktimin e masës së paraburgimit, meqë ekzistojnë të gjitha bazat ligjore për atë”, thuhet në njoftimin e Prokurorisë.

Ministria e Brendshme ka njoftuar se ka arrestuar të dyshuarin Kire Gjorgjievski, i cili ne incizimet e dala nga 27 prilli shihet qartë duke tërhequr zvarrë deputetin Ziadin Sela. Bashkë me të është arrestuar edhe babai i tij Çejo Gjorgjievski i përfshirë edhe ai në këtë ngjarje.

Nga bastisja që ka kryer MPB në shtëpinë e tyre janë gjetur akoma rrobat me gjak nga nata e dhunshme e 27 prillit, këpucët me njolla gjaku të asaj mbrëmje dhe 3 celularë ku shpresohet në to të gjenden biseda të mundshme telefonike. Të gjitha këto janë konfiskuar si prova materiale.