Paralajmërimi i Doganës për veturat e vjetra

Dogana e Kosovës përmes një postimi në rrjetet sociale, ka bërë një njoftim me interes rreth rregullave të reja për automjetet, që kanë zgjuar shumë kërshëri në Kosovë, përcjell albinfo.ch.

“Nga data 1 janar 2018 të gjitha veturat e kategorisë M1 më të vjetra se 10 vite dhe ato që nuk kanë motor të standardit euro 4 nuk mund të zhdoganohen në Republikën e Kosovës”, thuhet në njoftim.

“Kjo nënkupton se të gjitha automjetet të cilat janë regjistruar për herë të parë në këtë periudhë të vitit 2008 dhe i plotësojnë kushtet për lirimin e gazrave sipas standardit të përcaktuar me EURO 4 mund të importohen në Kosovë. I vetmi institucion në Kosovë i cili ka mundësi për përcaktimin e nivelet të lirimit të gazrave është institucioni i autorizuar për homologim ‘Eurolab’”, thuhet më tutje në njoftim.

Kjo ndalesë nuk zbatohet në importin e:

1. Mjeteve motorike për transport të mallrave
2. Automjeteve të importuara në procedurë Importit të Përkohshëm (IM5),
3. Automjeteve për shfrytëzim nga misionet diplomatike (ligji nr. 03/l-033), dhe
4. Automjetet me vlerë muzeore (old timer).