Parlamenti Evropian heq imunitetin e eurodeputetit gjerman të ekstremit të djathtë

Keystone EPA/CHRISTOPHE PETIT TESSON

Parlamenti Evropian ka votuar për heqjen e imunitetit të ligjvënësit gjerman Petr Bystron, anëtar i partisë së djathtë ekstreme Alternativa për Gjermaninë (AfD). Vendimi lidhet me hetimet për pastrim parash, marrje ryshfeti, mashtrim dhe evazion fiskal.

Autoritetet dyshojnë se Bystron ka marrë pagesa nga media pro-ruse “Zëri i Evropës” për të mbështetur interesat ruse në Bundestagun gjerman. Kjo platformë është ndaluar së fundmi në Bashkimin Evropian për përhapje propagande pro-Kremlinit dhe financim të politikanëve në disa shtete.

Sipas një raporti të Komitetit për Çështjet Ligjore të PE-së, hetimet ndaj Bystron janë në zhvillim edhe për shkak të një postimi në rrjetet sociale, ku ai shfaq politikanë gjermanë duke bërë gjeste që mund të interpretohen si përshëndetje naziste. Prokuroria e Mynihut është duke shqyrtuar rastin, transmeton albinfo.ch.

Bystron i ka mohuar të gjitha akuzat, duke i quajtur hetimet të motivuara politikisht. Ai ishte hetuar më parë edhe nga Bundestagu, i cili në maj të vitit të kaluar i hoqi përkohësisht imunitetin, para se ai të zgjidhej si eurodeputet në qershor.