Policia konfirmon pritjet e gjata në Merdarë

Edhe Policia e Kosovës ka konfirmuar se pikëkalimi në Merdarë është i frekuentuar dhe pritjet janë të gjata, kurse në pikat tjera kufitare situata është më e qetë

Kolonat e gjatë për mërgimtarë në Merdarë i ka konfirmuar edhe Policia e Kosovës, që bën të ditur se pikëkalimet tjera janë më të qeta.

“Policia e Kosovës po punon intensivisht me zyrtarët e saj, duke aplikuar edhe procedura të përshpejtuara të kontrollit, vetëm për të lehtësuar qarkullimin dhe lehtësuar lëvizjen në kufi, por për shkak të koncentrimit të madh në Merdarë, raportohet për pritje dhe kolona më të gjata”, ka thënë zëdhënësi i Policisë së Kosovës, Daut Hoxha për “Radio Evropa e Lirë”, përcjell albinfo.ch.

Kolonat në Merdarë gjatë fundjavës ishin disa orëshe dhe mërgimtarët sërish u ballafaquan me shumë vështirësi. Madje, në mbrëmje kur temperaturat filluan të bien, pritjet ishin 5 deri në 6 orë. Mërgimtarët edhe për të hyrë në Kosovë kishin pritur me orë të tëra.