Policia konfiskon 19 mijë euro të falsifikuara

Policia e Kosovës, përmes një komunikate për media ka njoftuar se ka arrestuar tre të dyshuar për veprën penale “falsifikim i parasë”.

Përmes kësaj komunikate bëhet e ditur se si rezultat i hetimeve disa mujore dhe aplikimit të masave të fshehta the teknike nga Njësia e Krimeve Ekonomike dhe Antikorrupsion në Gjilan, është ekzekutuar urdhëresa e Gjykatës Themelore të Gjilanit për simulimin e blerjes së parave të dyshuara të falsifikuara, përcjell albinfo.ch.

“Gjatë realizimit të urdhëresës, me rastin e simulimit të veprës penale, njësitet policore kanë arritur të ndalojnë tre persona të dyshuar, (në një pompë të derivateve në komunën e Kllokotit) dhe gjatë kontrollimit të tyre janë gjetur dhe sekuestruar; një armë e llojit bereta, me 6 copë fishekë, para në kartëmonedha prej 192×100 me vlerë të përgjithshme prej 19.200 € (nëntëmbëdhjetë mijë e dyqind) €, të cilat dyshohet të jenë të falsifikuara” thuhet në njoftim.

Policia e Kosovës bën të ditur që kjo shumë prej 19 mijë e 200 eurosh të falsifikuara do të blihej për 5 mijë euro para origjinale.

Me këtë rast janë arrestuar tre persona, dy nga Kosova dhe një nga Maqedonia.