Probleme në avion, bëhet ulje e detyrueshme

Defekti që pësoi avioni në linjën Tiranë-Lubjanë duhet të ketë qenë serioz dhe i rëndë, për faktin se është bërë ulje e detyruar në Zagreb, deklaroi një pasagjer

Aeroplani “Adria” i linjës Tiranë-Lubjanë ka pësuar defekt gjatë fluturimit të ditës së sotme dhe është detyruar të zbres dhunshëm në aeroportin e Zagrebit. Kështu tregojnë disa nga udhëtarët e kësaj ligje, të cilët janë detyruar që nga Zagrebi të udhëtojnë me autobus drejt Lubjanës.  

Paulin Vilajeti ka qenë njëri nga pasagjerët i cili ka rrëfyer për “A1 Report” në lidhje me defektin në aeroplan. Ai nëpërmjet telefonit ka thënë se nga personali i avionit janë lajmëruar se duhet të bëjnë një ulje të detyruar në Zagreb, për shkak të defektit në aeroplan.

“Defekti që pësoi avioni duhet të ketë qenë serioz dhe i rëndë, për faktin se është bërë ulje e detyruar në një qytet jo shumë larg nga destinacioni i fluturimit. Pas zbritjes në aeroportin e Zagrebit, udhëtarët po vijojnë udhëtimin me autobus drejt Lubjanës|, ka deklaruar Vilajeti.

Paulini thotë se u është dashur të presin 45 minuta në aeroport, ndërsa shton se u janë kontrolluar sërish pasaportat.

“Prisnim të na sqaronin dhe të na transferonin të udhëtonim me linjat e mundshme, por nuk ndodhi kjo. Qëndruam për 45 minuta në aeroport dhe më pas vendosën të na çonin më autobus drejt Lubjanës”, citon “Shekulli” Vilajetin.

Ndërkaq, ai thotë se gjendja shëndetësore e pasagjerëve është e mirë, dhe nuk pati probleme gjatë uljes. Sipas autoriteteve shqiptare të trafikut ajror, ka qenë një ulje e detyruar për arsye sigurie si pasojë e kushteve klimaterike, dhe nuk ka pasur asnjë problem për pasagjerët.